Ministria e Arsimit dhe Shkencës ka shprehur shqetësim në lidhje me rastin e raportuar në komunën e Gjakovës për ngacmim seksual nga ana e drejtorit të një institucioni arsimor.
Menjëherë pas marrjes së informacionit, Inspektorati i Arsimit ka kontaktuar Policinë e Kosovës dhe Drejtorinë Komunale të Arsimit në Gjakovë për të siguruar të dhënat relevante mbi veprimet institucionale.
Komisioni disiplinor ka marrë vendim për pezullimin e drejtorit nga marrëdhënia e punës të mërkurën. I dyshuari ishte drejtori i shkollës fillore “Pjetër Bogdani” në Demjan të Gjakovës dhe dyshohet se ka ngacmuar seksualisht një vajzë 17-vjeçare.
Ministria ka theksuar se çdo formë e ngacmimit seksual, dhunës dhe keqpërdorimit të pozitës zyrtare në institucionet arsimore është e papranueshme dhe e dënueshme. Ajo pret që të gjitha institucionet përgjegjëse ta trajtojnë rastin me prioritet, profesionalizëm dhe në përputhje të plotë me legjislacionin në fuqi.
Ministria ka deklaruar se do të vazhdojë të përcjellë zhvillimet dhe do të ofrojë mbështetjen institucionale brenda kompetencave të saj.