Ministria e Bujqësisë, Pylltarisë dhe Zhvillimit Rural ka hapur të hënën zyrën e re në Mitrovicën e Veriut. Në këtë objekt janë vendosur Drejtoria Rajonale e Agjencisë për Zhvillimin e Bujqësisë dhe Drejtoria Rajonale e Agjencisë Pyjore të Kosovës, të cilat deri tani operonin në hapësira me qira.
Në ceremoninë e hapjes morën pjesë kryeministri i Kosovës Albin Kurti, ministri i Bujqësisë Armend Muja, ministri i Brendshëm Xhelal Sveçla, ministri për Komunitete dhe Kthim Elbert Krasniqi, si dhe kryetari i Mitrovicës së Jugut Faton Peci.
Kurti u pyet nga mediat serbe pse nuk ishte i pranishëm kryetari i Mitrovicës së Veriut, i cili vjen nga radhët e minoritetit serb. Ai u përgjigj se të gjithë duhet të kujdesen më shumë për qytetarët e thjeshtë, duke theksuar se kryetarët e komunave janë shtresë e lartë e qytetarëve. Ai sugjeroi mediat të mos brengosen për ta.
Në fjalimin e tij, Kurti deklaroi se diskriminimit i ka ardhur fundi. "I falënderoj të gjithë që kontribuuat që sot ta kemi këtë ditë, që ofron gjithpërfshirje", u shpreh Kurti.