Ministria e Infrastrukturës dhe Transportit ka njoftuar se ditën e hënë, më 28 korrik 2026, nuk do të aplikohen kufizime për lëvizjen e automjeteve të transportit të mallrave, të cilat kanë një masë totale mbi 20 tonë. Sipas njoftimit zyrtar, ky vendim është marrë në përputhje me vlerësimet meteorologjike të publikuara.
Sipas parashikimeve zyrtare të motit, temperaturat e pritshme për datën 28 korrik nuk i plotësojnë kushtet e përcaktuara në vendimin përkatës, i cili parashikon kufizime të përkohshme për sigurinë dhe gjendjen e akseve rrugore gjatë periudhave me nxehtësi të lartë.
Ministria bëri të ditur se do të vazhdojë monitorimin e përditshëm të kushteve atmosferike. Në rast se kushtet meteorologjike në të ardhmen do të kërkojnë marrjen e masave kufizuese për mbrojtjen e infrastrukturës rrugore, qytetarët dhe operatorët ekonomikë do të njoftohen me kohë për ndryshimet e mundshme.