Ministrja në detyrë e Mjedisit dhe Planifikimit Hapësinor, Fitore Pacolli, ka njoftuar se institucioni që ajo udhëheq ka dorëzuar tri lëndë për hetim në Prokurorinë Themelore në Prishtinë. Këto dosje përmbajnë dyshime mbi proceset e shpronësimit dhe tjetërsimit të kundërligjshëm të pronës publike.
Përmes një komunikimi publik, Pacolli deklaroi se mbrojtja e pronës shtetërore është detyrim ligjor dhe përgjegjësi ndaj qytetarëve. Ajo theksoi se asnjë palë nuk mund të përfitojë në mënyrë të kundërligjshme në kurriz të interesit publik. Sipas ministres, veprimet e ndërmarra synojnë zbardhjen e plotë të këtyre rasteve nga organet kompetente të drejtësisë.
Ministria e Mjedisit, Planifikimit Hapësinor dhe Infrastrukturës ka bërë të ditur se do të vazhdojë të ndërmarrë të gjitha hapat ligjorë të nevojshëm për të mbrojtur pasurinë publike. Institucioni gjithashtu ka konfirmuar angazhimin për të kërkuar llogaridhënie për çdo dyshim që lidhet me keqpërdorimin e pronave publike, duke theksuar se rastet tashmë janë në duart e prokurorisë për shqyrtim dhe hetim të mëtejshëm.