Prokuroria Themelore në Prishtinë ka kryer bastisje në Agjencinë Kadastrale të Kosovës, në kuadër të hetimeve për abuzime në tjetërsimin e pronave publike.
Ministrja e Mjedisit dhe Planifikimit Hapësinor, Fitore Pacolli, ka reaguar përmes një postimi në Facebook, duke deklaruar se për një kohë të gjatë ka pasur dyshime serioze për abuzime, deri në elemente të krimit të organizuar. Ajo thekson se mijëra hektarë tokë janë kaluar në pronësi private përmes procedurash të dyshimta.
Sipas Fitore Pacollit, institucionet përgjegjëse shpesh kanë dështuar të parandalojnë këto fenomene dhe në raste të caktuara dyshohet se kanë kontribuar në to. Që nga marrja e detyrës si ministre, ajo ka ndërmarrë hapa konkretë për luftimin e kësaj dukurie, duke emëruar drejtorin e ri në Agjencinë Kadastrale të Kosovës dhe duke kërkuar rishikimin e rasteve të dyshimta.
Fitore Pacolli shprehet e vendosur kundër çdo forme të krimit dhe keqpërdorimit të pronës publike, pa kompromis. Ajo përshëndet aksionin e prokurorisë si të vonuar, por të mirëpritur, dhe konfirmon mbështetjen e plotë të Ministrisë së Mjedisit dhe Planifikimit Hapësinor. Ministria është në dispozicion për të ndihmuar me çdo informacion dhe bashkëpunim të nevojshëm për zbardhjen e rasteve dhe vendosjen e ligjshmërisë në këtë institucion.