Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, ka njoftuar se institucionet vartëse të kësaj ministrie kanë ndërprerë marrëdhënien e punës me 9 zyrtarë. Sipas njoftimit, bëhet fjalë për 7 zyrtarë nga Agjencia për Mbrojtjen e Mjedisit të Kosovës (AMMK) dhe 2 zyrtarë nga Agjencia Kadastrale e Kosovës (AKK).
Ministrja Pacolli bëri të ditur se këta të fundit i përkasin komunitetit serb dhe njihen si ish-pjesëtarë të strukturës së quajtur “Mbrojtja Civile”. Vendimi për largimin e tyre është marrë për shkak të mungesës së vazhdueshme në vendin e punës dhe në mbështetje të rekomandimeve të Zyrës Kombëtare të Auditimit.
Pacolli theksoi se statusi i të punësuarit nuk mund të mbahet pa përmbushur detyrimet që rrjedhin nga kontrata e punës. Ajo shtoi se institucionet do të jenë të pakompromis në zbatimin e ligjit, pavarësisht përkatësisë apo pozitës së zyrtarëve, me qëllim që shërbimi ndaj qytetarëve të jetë sa më përgjegjës.
Me këto masa të fundit, numri i përgjithshëm i kontratave të shkëputura në kuadër të Ministrisë së Mjedisit, Planifikimit Hapësinor dhe Infrastrukturës dhe institucioneve të saj vartëse ka shkuar në 29. Më herët, ishin ndërprerë kontratat për 20 zyrtarë të tjerë të kësaj ministrie.