Kurti jep detaje për transferimet dhe kontratat e zyrtarëve serbë

Kryeministri i Kosovës, Albin Kurti, foli në Kuvend më 15 tetor për transferimin dhe largimin nga puna të zyrtarëve nga komuniteti serb, pas pyetjeve të deputetit të Partisë Demokratike të Kosovës (PDK), Eman Rrahmani, lidhur me pagesat për punonjësit që, sipas tij, merrnin paga pa ushtruar detyra zyrtare. Rrahmani tha më vonë në emisionin Debat Plus se pagesat për gjashtë vjet arritën gjithsej në 4 milionë e 889 mijë euro për persona që, sipas tij, nuk shkonin në punë.

Transferimet në Ministrinë e Punëve të Brendshme

Kurti tha se, sipas vendimit të Qeverisë nr. 06/39, të 22 korrikut 2015, ish-Ministria e Administratës Publike kishte detyrimin të sistemonte 20 punonjës nga komuniteti serb, me qëllim integrimin e tyre në institucionet e Kosovës. Sipas kryeministrit, ata nuk kishin ushtruar detyra zyrtare në ministri që nga nënshkrimi i akteve të emërimit. Gjatë vitit 2025, Ministria e Punëve të Brendshme ndërmori veprime për transferimin e tyre në komisione të tjera brenda ministrisë.

Pas vendimeve për transferim, katër zyrtarë u larguan nga shërbimi civil pas shqyrtimit të masave disiplinore, ndërsa 15 të tjerë paraqitën ankesa kundër vendimeve pranose Këshillit të Pavarur Mbikëqyrës për Shërbimin Civil të Kosovës.

Ndërprerja e kontratave

Kurti foli edhe për ndërprerjen e kontratave të 29 zyrtarëve nga komuniteti serb në Ministrinë e Mjedisit dhe Planifikimit Hapësinor dhe institucionet vartëse. Ai tha se vendimi u mor për shkak të mungesave të vazhdueshme në vendet e punës dhe në bazë të rekomandimeve të Zyrës Kombëtare të Auditimit. Sipas ndarjes së dhënë prej tij, 20 punonjës ishin në ministri, shtatë në Agjencinë për Mbrojtjen e Mjedisit të Kosovës dhe dy në Agjencinë Kadastrale të Kosovës.

Kurti tha se zyrtarët njiheshin edhe si pjesëtarë të Mbrojtjes Civile, të cilën Qeveria e Kosovës e shpalli organizatë terroriste në qershor të vitit 2023.

Pretendimet për pagesat

Në Kuvend, Rrahmani tha se 80 punonjës kishin marrë paga pa shkuar asnjë ditë në punë dhe se pagesat për vitin 2025 arritën në 589 884 euro. Ai pretendoi se këta persona kishin qenë pjesë e strukturave paralele serbe që kishin funksionuar në veri të Kosovës. Në Debat Plus, ai tha se shuma e paguar për gjashtë vjet ishte gjithsej 4 milionë e 889 mijë euro.

Kurti tha se në vitin 2024 ishin larguar nga puna edhe 18 zyrtarë të tillë. Sipas tij, veprimet nuk mund të kryhen të gjitha menjëherë, pasi kërkojnë ndjekjen e procedurave dhe ligjeve. Ai shtoi se, nëse institucionet nxitojnë, organet e tjera shtetërore mund t’i rikthejnë punonjësit në punë dhe të kërkojnë pagesën e dëmshpërblimeve.