Ministria e Turizmit, Kulturës dhe Sportit ka reaguar zyrtarisht pas deklaratave të sportistit David Nikolli, i cili pretendoi se ishte larguar nga puna si pasojë e pjesëmarrjes në një protestë. Institucioni i ka cilësuar këto pretendime si të pavërteta, duke theksuar se nuk ekziston asnjë akt administrativ apo fakt që të dëshmojë një marrëdhënie punësimi të Nikollit në ndonjë institucion shtetëror të Republikës së Shqipërisë.
Sipas njoftimit zyrtar, sportisti prej vitesh jeton dhe ushtron aktivitetin e tij profesional në Itali. Megjithatë, Nikolli ka përfituar mbështetje financiare shtetërore, duke përfshirë trajtim ushqimor dhe shpërblime, në kuadër të statusit të sportistit të nivelit të lartë gjatë periudhës 2024-2026.
Lidhur me marrëdhënien me Klubin Sportiv Partizani, ministria sqaron se nuk ka pasur asnjë përjashtim. Përkundrazi, klubi i ka ofruar mundësinë e vazhdimit të bashkëpunimit përmes lidhjes së një kontrate të re, me kushtin që sportisti të paraqesë një kërkesë zyrtare për shqyrtim nga organet drejtuese.
Institucioni ka shprehur gjithashtu rezerva lidhur me përmbushjen e detyrimeve rregullatore. Sipas verifikimeve, David Nikolli nuk rezulton të jetë pjesë e sistemit kombëtar të regjistrimit antidoping dhe nuk ka dokumentuar kontrollet përkatëse sipas procedurave ligjore. Ministria nënvizon se çdo e drejtë për përfitime financiare shtesë mbetet e lidhur ngushtë me respektimin e këtyre detyrimeve dhe kritereve ligjore.