Ministria e Shëndetësisë dhe Mbrojtjes Sociale njoftoi më 20 prill se shërbimi në Spitalin Universitar të Traumës (SUT) nuk është ndërprerë dhe rikonstruksioni i godinës kryhet me faza për të mos penguar trajtimin e pacientëve.
Sipas njoftimit, blloku i urgjencës është plotësisht i riorganizuar dhe funksional. Në Kirurgjinë Ortopedike, ndërhyrjet kirurgjikale vijojnë normalisht me dy turne pune, duke përfshirë edhe fundjavat.
Ministria dhe spitali sigurojnë se sallat operatore monitorohen vazhdimisht dhe nuk paraqesin rrezik bakterial. Furnizimet me medikamente dhe materiale mjekësore janë të garantuara, pa asnjë mungesë.
SUT mbetet shtylla kryesore e sistemit shëndetësor, i gatshëm për të përballuar çdo fluks pacientësh dhe për të siguruar shërbim cilësor.
Ky sqarim erdhi pas deklaratës së deputetes Erisa Xhixho të Partisë së Lirisë, e cila kërkoi me urgjencë interpelancë me Ministren e Shëndetësisë Evis Sala. Xhixho pretendoi se rikonstruksioni ka bllokuar shërbimet dhe rrezikon përballimin e emergjencave kombëtare.