Ministrja e Brendshme, Albana Koçiu, ka reaguar për protestën e Partisë Demokratike duke ndarë pamje në rrjetet sociale më 20 shkurt.
Pamjet tregojnë besimtarët që falen në Xhaminë e Namazgjasë, ndërsa militantët e opozitës hedhin molotovë. Koçiu përshkruan situatën si dy realitete të ndryshme.
Në postimin e saj, ajo shkruan: "Sot kryeqyteti u nda në dy realitete që nuk kanë asgjë të përbashkët. Nga njëra anë, përulësia e besimtarëve që kërkojnë paqe; nga ana tjetër, banda e çadrave dhe e molotovit që me maska në fytyrë nxisin dhunë. Ndërkohë që dëgjohet lutja, ulërijnë britmat për shkatërrim."
Ajo vazhdon: "Është një kontrast që të lë pa fjalë: Lutja përballë mallkimit. Qytetaria përballë vandalizmit."
Koçiu përmend besimtarët e ekspozuar ndaj gazit lotsjellës gjatë ritit fetar dhe përfundon: "Përballë kësaj marrëzie që djeg qytetin për hallin e karriges së një njeriu, duke u kërkuar ndjesë besimtarëve që ishin aty në ritualin e lutjeve e u përballën me situatën e gazit lotsjellës, mbetet të themi vetëm një fjali: Fali Zot, se nuk dinë ç’bëjnë."
Reagimi vjen pas tensioneve në protestë, ku u përdorën lëndë plasëse dhe u raportua kaos pranë xhamisë.