Sipas njoftimit zyrtar të Ministrisë së Industrisë, Ndërmarrësisë, Tregtisë dhe Inovacionit (MINT), çmimet e derivateve në tregun e Kosovës për datat 5 dhe 6 korrik 2026 kanë mbetur të pandryshuara. Çmimet maksimale të shitjes janë caktuar si më poshtë:
• Nafta: 1.41 euro për litër
• Benzina: 1.36 euro për litër
• Gazi: 0.64 euro për litër
Ministria ka vendosur ta vazhdojë për 30 ditë masën e përkohshme për rregullimin e çmimeve maksimale, me synimin për mbrojtjen e konsumatorëve dhe garantimin e çmimeve të arsyeshme në treg. Ky vendim është marrë pas monitorimit të vazhdueshëm të tregut dhe analizës së të dhënave nga Dogana e Kosovës.
Sipas MINT, çmimet e importit nuk kanë shënuar ulje. Institucioni vëren se ndryshimet në tregjet ndërkombëtare reflektohen në tregun vendor kryesisht kur ka rritje të çmimeve, ndërsa uljet shpesh janë të vonuara ose nuk pasqyrohen plotësisht.