Mir Bruli, biznesmeni nga Velipoja dhe pronari i resortit turistik “Ara e Vjetër”, është transportuar nga burgu i Fierit drejt QSUT-së në Tiranë, ku pritet t’i nënshtrohet një ndërhyrjeje në zemër. Sipas informacioneve paraprake, ai ndodhet në gjendje të rëndë shëndetësore dhe nën kujdesin e mjekëve.
Bruli u arrestua më 17 maj 2024 në Velipojë, gjatë një operacioni të zhvilluar me urdhër të Prokurorisë së Posaçme kundër Korrupsionit dhe Krimit të Organizuar (SPAK). Gjatë operacionit u lëshuan 50 urdhër-arreste në disa qytete të vendit.
Më 29 prill 2026, Gjykata e Posaçme e dënoi me nëntë vjet burg; me gjykim të shkurtuar, dënimi u bë gjashtë vjet. Vendimi i formës së prerë nga apeli i Gjykatës së Posaçme ende nuk është dhënë. Bruli, 58 vjeç, u shpall fajtor për transportimin në mënyrë të paligjshme nga Mali i Zi drejt Shqipërisë të disa shtetasve të dyshuar për përfshirje në veprimtari kriminale.
Bruli është i afërm i biznesmenit Pëllumb Gjoka, i arrestuar në kuadër të dosjes “Metamorfoza”. Gjykata e Posaçme e shpalli Gjokën fajtor për sigurimin e kushteve për vrasjen e dy personave dhe e dënoi me gjashtë vjet burg. Ish-funksionari i policisë Ardit Hasanbegaj u dënua me pesë vjet burg.
Gjoka po përballet edhe me një proces të dytë në Gjykatën e Posaçme, së bashku me dy persona të tjerë. Akuzat përfshijnë vrasjen e Gjin Ndojit, i njohur si Boriçi, dhe sigurimin e kushteve për vrasjen e personave të tjerë. Hetimi ndaj Gjokës dhe të pandehurve të tjerë nisi pas mbërritjes së një dosjeje nga Franca, me të dhëna të siguruara nga aplikacioni i koduar Sky ECC.
Sipas burimeve, ndaj Gjokës dhe anëtarëve të tjerë të grupit janë ngritur nëntë lloje akuzash, përfshirë vrasjen, korrupsionin aktiv dhe pastrimin e parave. Zyrtarët e arrestuar si pjesë e organizatës u akuzuan për korrupsion, zbulim të akteve ose të dhënave sekrete, si dhe sigurimin e kushteve dhe mjeteve për kryerjen e vrasjeve.