Mëngjesin e së dielës, rreth orës 08:20, autoritetet policore kanë pranuar një njoftim për gjetjen e një 25-vjeçari pa shenja jete në një banesë në Mitrovicën e Jugut. Lajmin e ka konfirmuar për mediat zëdhënësi i Policisë së Kosovës për rajonin e Mitrovicës, Avni Zahiti.
Sipas njoftimit zyrtar, menjëherë pas marrjes së informacionit, në vendin e ngjarjes kanë dalë njësitë përkatëse policore dhe ekipi mjekësor, ku ky i fundit ka konstatuar vdekjen e të riut.
Me urdhër të prokurorit, janë ndërmarrë veprimet e nevojshme hetimore për zbardhjen e rrethanave të ngjarjes. Trupi i pajetë është dërguar në Institutin e Mjekësisë Ligjore (IML) për obduksion, që do të përcaktojë shkakun zyrtar të vdekjes. Policia e Kosovës vijon hetimet për rastin, i cili është klasifikuar si "vdekje e dyshimtë".