Kryeministri grek Kyriakos Mitsotakis kundërshtoi më 30 tetor, në një paraqitje para Këshillit të Sigurimit të OKB-së, marrëveshjen detare mes Turqisë dhe Libisë. Duke paraqitur një hartë, ai tha se vija detare e përcaktuar nga të dyja vendet nuk merr parasysh ishujt grekë në zonë.
Mitsotakis përmendi Kretën, Rodosin, Karpathosin dhe Kason. Sipas tij, Turqia dhe Libia nuk kanë brigje përballë ose ngjitur me njëra-tjetrën që të justifikojnë një kufi të tillë. Ai e përshkroi vijën si përcaktim “diagonal” pa precedent dhe tha se memorandumi shkel parimet themelore të së drejtës ndërkombëtare të detit. Athina e cilëson marrëveshjen të paligjshme dhe thotë se ajo nuk mund të cenojë të drejtat sovrane të Greqisë.
Marrëveshja u nënshkrua fillimisht në 2019 dhe u miratua javën e kaluar edhe nga parlamenti në Libinë lindore. Presidenti turk Recep Tayyip Erdogan tha se kundërshtimet ndaj saj nuk kanë bazë legjitime dhe se Turqia është e vendosur të neutralizojë këdo që përpiqet ta pengojë në arritjen e objektivave të saj. Përfaqësuesi turk në Këshillin e Sigurimit tha se hartat mund të paraqesin pretendimet e një shteti, por nuk përcaktojnë se cila palë ka të drejtë.
Egjipti, Bahreini dhe Emiratet e Bashkuara Arabe kanë shprehur kundërshtime ndaj marrëveshjes, në krah të Greqisë.
Mitsotakis ngriti gjithashtu çështjen e sigurisë së lundrimit tregtar nga Deti i Zi deri në Detin e Kuq. Kjo çështje u trajtua disa orë pasi një anije tregtare në pronësi të një kompanie greke u godit nga dronë dhe u fundos në Detin e Zi, pranë brigjeve të Bullgarisë.