Temperaturat e ulëta kanë sjellë reshje bore në disa zona të qarkut të Kukësit, kryesisht në segmentet e larta malore, ku është shfaqur edhe mjegull e dendur. Këto kushte janë regjistruar gjatë natës dhe në orët e para të mëngjesit të së mërkurës, 1 prill 2026.
Reshjet e dëborës janë raportuar në aksin Kukës-Shishtavec, ku kompania kontraktore ka ndërhyrë menjëherë me mjete borëpastruese dhe punëtorë për të mbajtur të kalueshëm segmentin rrugor. Ndërhyrjet janë përqendruar nga Ura e Shtrezës deri në doganën e Shishtavecit, ku vazhdon prania e dëborës dhe mjegullës së dendur.
Sipas të dhënave nga terreni, intensiteti i reshjeve të dëborës në lartësitë mbi 700 metra mbi nivelin e detit është në rënie. I gjithë qarku i Kukësit është përfshirë nga mot i paqëndrueshëm, me reshje shiu në zonat e ulëta, reshje bore në ato të larta dhe erëra të forta. Trashësia e dëborës në zonat malore nuk ka kaluar 3 centimetra, çka nuk ka krijuar probleme serioze në lëvizjen e automjeteve apo qarkullimin rrugor.
Në segmentin Kukës–Tunel i Rrugës së Kombit, sipas kompanisë mirëmbajtëse, nuk ka prezencë dëbore dhe qarkullimi i mjeteve vijon normalisht.
Autoritetet u bëjnë thirrje qytetarëve të shmangin udhëtimet e panevojshme drejt zonave të thella malore dhe të respektojnë udhëzimet e policisë rrugore dhe shërbimeve të mirëmbajtjes.