Ish-deputetja Monika Kryemadhi paraqitet paradite më 12 mars 2026 në Gjykatën e Posaçme Kundër Korrupsionit dhe Krimit të Organizuar (GJKKO) për seancën e radhës. Ajo ndiqet si e pandehur bashkë me ish-bashkëshortin e saj, ish-presidentin Ilir Meta, për fshehje dhe mosdeklarim pasurie, pas kërkesës së Strukturës së Posaçme Kundër Korrupsionit dhe Krimit të Organizuar (SPAK). Në proces marrin pjesë edhe tre persona të tjerë të pandehur.
Kryemadhi, e cila ndiqet në gjendje të lirë, komunikoi me gazetarët para hyrjes në godinë. Ajo e quajti ditën "super", duke thënë: "Sot është ditë super… gjyqi ynë, imuniteti i Belindës në parlament, protesta e opozitës, filmi im pasdite…". Ajo bëri batutë: "Qenkeni të gjithë te protesta! Sot mbasdite kemi filmin hë… mos harroni të vini! Super… super…, por të gjithë pas meje vijnë". Ajo kujtoi se filmi i saj do të shfaqet në orën 18:00.
Avokati i Ilir Metës, Kujtim Cakrani, u shpreh teksa hynte në godinën e SPAK-GJKKO: "Sot ka ngjarje të mira në këtë seancë…". Meta qëndron i paraburgosur prej 21 tetorit 2024.