Situata në jug të Francës mbetet e vështirë për shkak të zjarreve pyjore që po përhapen me shpejtësi. Vatra kryesore në Herault, e cila shpërtheu të mërkurën pasdite, së bashku me dy vatra të tjera në skajin perëndimor të Marsejës, kanë shkrumbuar një sipërfaqe totale prej 1,210 hektarësh. Sipas të dhënave, vetëm vatra në Herault ka përfshirë mbi 800 hektarë.
Ministri i Brendshëm i Francës, Laurent Nunez, konfirmoi angazhimin e forcave zjarrfikëse dhe të avionëve cisternë në një operacion të vështirë, të nxitur nga temperaturat e larta, thatësira dhe erërat e forta. Kjo situatë ishte paralajmëruar nga Organizata Botërore Meteorologjike, e cila në fund të qershorit njoftoi se temperaturat rekord në Europën Perëndimore do të rrisnin ndjeshëm rrezikun e zjarreve për shkak të bimësisë së tharë dhe lagështisë së ulët.
Ndërkohë, Italia po përjeton kontraste klimatike. Përderisa pjesë të vendit përballen me vapën, në kalimin e Stelvios në Alpet italiane janë regjistruar reshje të reja bore. Gjithashtu, në Positano, shirat e rrëmbyeshëm kanë shkaktuar pasoja, të cilat janë pasqyruar edhe në videot e turistëve të shpërndara në rrjetet sociale.