Jugu i Francës është përfshirë nga vatra të rrezikshme zjarri, të nxitura nga erërat e forta dhe temperaturat ekstreme. Sipas autoriteteve, flakët kanë shkrumbuar mbi 1.200 hektarë tokë, me situatën më kritike në zonën e Aude, pranë kufirit me Spanjën, ku janë djegur rreth 900 hektarë.
Në operacionin e shuarjes janë angazhuar 800 zjarrfikës. Në qytetin turistik Frejus, më shumë se 2.000 persona janë evakuuar nga gjashtë kampe pushimi. Ndërkohë, autoritetet kanë neutralizuar një vatër zjarri në Lancon-Provence, ku u dogjën 260 hektarë, ndërsa zjarri pranë aeroportit të Marsejës është vënë nën kontroll.
Organizata Botërore Meteorologjike ka bërë të ditur se ndërthurja e temperaturave rekord dhe bimësisë së tharë ka rritur ndjeshëm rrezikun e zjarreve në Europën Perëndimore. Autoritetet franceze paralajmërojnë një tjetër valë të të nxehtit javën e ardhshme.
Në anën tjetër, Rumania është goditur nga moti i ashpër pas vapës ekstreme. Një stuhi e fuqishme ka përfshirë Bukureshtin dhe 20 qarqe të tjera, duke shkaktuar vdekjen e një personi, i cili mbeti i bllokuar në automjet pasi një pemë u rrëzua mbi të. Stuhia ka lënë pas dëme të konsiderueshme në infrastrukturë, banesa dhe automjete.