Qarku i Elbasanit është përfshirë nga kushte të motit të ftohtë, me temperatura të ulëta që në zonat malore kanë zbritur nga -5 deri në -11 gradë Celsius. Situata paraqitet e qëndrueshme dhe pa problematika madhore.
Në akset rrugore nacionale dhe rurale, qarkullimi i mjeteve vijon normalisht, pa bllokime apo vështirësi të evidentuara, falë monitorimit dhe ndërhyrjeve të vazhdueshme nga strukturat përgjegjëse.
Prurjet e lumit Shkumbin dhe përroit të Zaranikës janë në rënie dhe nuk paraqesin rrezik për përmbytje në zonat përreth.
Janë raportuar ndërprerje të furnizimit me energji elektrike në Njësinë Administrative Labinot Mal të bashkisë Elbasan dhe në Njësinë Administrative Qendër të bashkisë Librazhd. Grupet e punës janë në ndjekje të situatës për rikthimin e energjisë sa më shpejt.
Në orën 09:00 do të ndërpriten shkarkimet në HEC Banjë, një veprim i planifikuar që po monitorohet për të shmangur ndikime në zonat poshtë digës.
Autoritetet lokale vijojnë monitorimin në terren dhe u bëjnë thirrje qytetarëve të tregojnë kujdes gjatë lëvizjeve, veçanërisht në zonat malore dhe në orët e para të mëngjesit.