Moti i keq shkakton përmbytje dhe dëme të shumta në Itali

Stuhitë e fuqishme që kanë goditur Italinë kanë shkaktuar përmbytje masive, dëme të konsiderueshme materiale dhe krizë në infrastrukturën e shumë qyteteve. Në ishullin Lipari, në provincën e Mesinës, porti Sottomonastero u përmbyt, duke bllokuar automjete dhe duke mbuluar rrugët me baltë e inerte pas daljes nga shtrati të përrenjve Ponte dhe Valle. Ndërkohë, në provincën e Trapanit, autoritetet e Bashkisë së Marsalas bënë të ditur se 11 familje mbetën pa strehë, ku tre familje janë akomoduar në hotele ose tek të afërmit. Për shkak të situatës së rënduar, autoritetet lokale në Siçili kanë urdhëruar mbylljen e shkollave dhe kanë aktivizuar qendrat operative komunale për menaxhimin e emergjencës.

Në Melito Porto Salvo, provinca e Reggio Calabrias, kryebashkiaku Tito Nastasi e përshkroi situatën si një "bombë uji", duke njoftuar kërkesën për shpalljen e gjendjes së fatkeqësisë natyrore pas shembjes së një muri dhe zhvendosjes së disa automjeteve drejt shkëmbinjve bregdetarë. Në provincën e Tarantos, në Sava, erërat e forta shkaktuan rrëzimin e strukturave të ndriçimit mbi automjetet e parkuara, pa shkaktuar të lënduar.

Në qytetin e Barit, përmbytjet përfshinë Bazilikën e Shën Nikollës, ku u dëmtua ashensori për personat me aftësi të kufizuara, ndërsa reliket e shenjtorit mbetën të padëmtuara. Probleme të theksuara u regjistruan edhe në Napoli, ku zjarrfikësit ndërhynë në rreth 150 raste, ndërsa një rrëshqitje dheu në Mergellina detyroi evakuimin e banorëve nga tri apartamente. Në rajonet e Ancios dhe Nettunos, pranë Romës, u raportuan 80 milimetra reshje brenda 24 orëve.

Mbrojtja Civile italiane ka vënë në fuqi alarmin portokalli për Kampanian, Kalabrinë, Pulian dhe Siçilinë. Ekipet e emergjencës, policia dhe vullnetarët janë në terren për të monitoruar situatën dhe për të ndihmuar qytetarët e bllokuar, ndërsa autoritetet u kanë bërë thirrje banorëve të kufizojnë lëvizjet për shkak të rrezikut të vazhdueshëm.