Një 27-vjeçar nga Gostivari u privua nga liria pasi policia e regjistroi duke drejtuar një motoçikletë Yamaha me 188 kilometra në orë në autostradën Gostivar–Tetovë. Shkelja u konstatua më 15 tetor, rreth orës 16:20, në një segment ku shpejtësia maksimale e lejuar është 80 kilometra në orë.
Sipas njoftimit të Ministrisë së Punëve të Brendshme (MPB), motoçikleta kishte targa të Gostivarit dhe u regjistrua nga nëpunës policorë të Njësitit mobil për sigurinë e komunikacionit rrugor, me ndihmën e një automjeti të posaçëm policor për ndjekje. Drejtuesi, i identifikuar me inicialet V.B., po lëvizte 108 kilometra në orë mbi kufirin e lejuar.
MPB-ja tha se 27-vjeçari u privua nga liria për shkak të dyshimit për kryerjen e veprës penale të drejtimit të pakujdesshëm të automjetit, të parashikuar në nenin 297-a të Kodit Penal. Sipas njoftimit, janë ndërmarrë masat përkatëse dhe ndaj tij do të vijojë procedura në përputhje me ligjin.
Ministria njoftoi se kontrollet e shtuara me automjete speciale policore do të vazhdojnë në të gjithë vendin, me synimin për të zbuluar dhe sanksionuar drejtuesit e papërgjegjshëm dhe për të rritur sigurinë në rrugë. MPB-ja u bëri thirrje pjesëmarrësve në komunikacion të respektojnë rregullat dhe kufizimet e shpejtësisë.
Sipas ministrisë, tejkalimi i shpejtësisë së lejuar është ndër shkaqet kryesore të aksidenteve rrugore, të cilat mund të sjellin pasoja të rënda për pronën, shëndetin dhe jetën.