Motra e Fredi Lamaj, polici i dyshuar për dhunimin e babë e bir në Fier, ka dalë për herë të parë publikisht për të mohuar akuzat e Altin Mecajt. Reagimi vjen pas disa ditësh deklaratash publike të Mecajt në media.
Ajo ka hedhur poshtë pretendimet, duke deklaruar se Fredi Lamaj nuk ka marrë pjesë në asnjë rrahje apo konflikt dhe se kjo mund të faktohet. Sipas saj, akuzat janë të pavërteta dhe denigruese, ndërsa Mecaj paraqitet padrejtësisht si viktimë.
Motra ka depozituar kallëzim penal për përndjekje ndaj Mecajt. Ajo sqaron se pretendimi i tij se ndaj saj ka bërë vetëm një koment komplimentues në Facebook nuk qëndron. Në vend të tij, ajo ka qenë subjekt i mesazheve private të shumta, të vazhdueshme dhe insistuese, që përbëjnë ngacmim.
Në deklaratën e saj, ajo thekson: "Kjo është hera e parë që flas publikisht dhe në media, dhe po e bëj vetëm sepse ndihem e detyruar të sqaroj disa të pavërteta që po përsëriten prej ditësh. Unë jam motra e Fredi Lamaj dhe dua të sqaroj se akuzat e shtetasit Altin Mecaj, sikur vëllai im e ka dhunuar, nuk janë të vërteta. Fredi Lamaj nuk ka marrë pjesë në asnjë rrahje apo konflikt, dhe kjo mund të faktohet."
Ajo shton se nuk ka dhënë asnjë përgjigje ndaj mesazheve, pasi platforma nuk e lejonte komunikimin, duke e bërë atë njëanshëm dhe të padëshiruar. Këto sjellje kanë shkaktuar shqetësime serioze emocionale dhe familjare.
Përditësime
Motra e Fredi Lamajt, e ardhur nga Italia, depozitoi dje kallëzimin kundër Mecajt në Fier.
Ajo akuzon Mecaj se prej 6-7 ditësh bën deklarata të pavërteta në media, duke prekur vëllain e saj dhe duke sjellë pasoja të rënda familjare.
Ajo publikoi mesazhe specifike nga Mecaj: 'Je femra më e bukur në fshatin tonë', 'Të dëshiroj si i çmendur' dhe 'Mos ki frikë nga unë, të pres në Vjosë'.
Sipas saj, sjellja e Mecajt është e përsëritur edhe ndaj vajzave të tjera, raporton Balkan Web.