José Mourinho vazhdon të jetë në qendër të zërave për stolin e Real Madridit. Trajneri portugez, aktualisht në krye të Benficës, pret zhvillimet në Santiago Bernabéu, ku kontaktet mes palëve konsiderohen aktive sipas mediave nga Portugalia dhe Spanja.
Presidenti Florentino Pérez e vlerëson shumë Mourinhon dhe e sheh atë si profilin ideal për të rikthyer disiplinën në një skuadër që kaloi një sezon të vështirë me rezultate zhgënjyese, probleme në dhomat e zhveshjes dhe mungesë trofesh. Mourinho ka shprehur publikisht dëshirën për rikthim në Madrid, por ka mohuar kontaktet direkte: "Nuk e kam pasur asnjë kontakt me Florentino Pérez-in apo drejtuesit e Real Madridit", deklaroi ai në konferencë për shtyp.
Detajet e negociatave
Sipas gazetës spanjolle AS, bisedimet nisi mes përfaqësuesit Jorge Mendes dhe Real Madridit, por pritet të intensifikohen pas përfundimit të kampionateve. Mourinho ka dy kushte kryesore:
- Ndikim në afatin kalimtar për të përcaktuar pozicionet që duhen përforcuar, duke mos specifikuar emra të veçantë.
- Hierarki të qartë dhe respektim të autoritetit në strukturën e klubit për të shmangur tensionet.
Këto kërkesa mbështeten në përvojën e tij të parë te Reali (2010-2013), kur klubi afroi lojtarë si Luka Modrić, Sami Khedira dhe Mesut Özil.
Kontrata me Benficën
Mourinho ka kontratë deri në 2027 me Benficën, e cila shërben si plan rezervë. Marrëveshja përfshin klauzolë largimi brenda 10 ditëve nga fundi i sezonit kundrejt 3 milionë eurove, shuma e përballueshme për Realin. Në Portugali tashmë diskutohet për zëvendësues të mundshëm, çka tregon seriozitetin e mundësisë.