Ministria e Punëve të Brendshme (MPB) njoftoi se gjatë 24 orëve të fundit janë regjistruar 11 denoncime për dhunë në familje në territorin e Maqedonisë së Veriut. Në disa raste, policia ka ndaluar persona të dyshuar, ndërsa për denoncimet e tjera po ndërmerren masa për zbardhjen dhe dokumentimin e ngjarjeve.
Denoncimet u raportuan në Prilep, rajonin e Strumicës, Veles, Zletovë, Gostivar, Ohër dhe disa zona të Shkupit. Në Prilep, një grua denoncoi se ish-partneri e kishte ndjekur dhe shqetësuar për një periudhë të gjatë, ishte paraqitur në vendin e saj të punës, e kishte ndjekur deri në shtëpi dhe i kishte dërguar mesazhe fyese.
Në një fshat të Komunës së Novo Sellës, policia ndaloi një 62-vjeçar, pas denoncimit se ishte sjellë në mënyrë agresive ndaj bashkëshortes së tij 57-vjeçare. Në Strumicë, një 65-vjeçar denoncoi sjellje agresive nga djali i tij 33-vjeçar, i cili më pas u dërgua në një institucion shëndetësor për trajtim.
Natën e 7 nëntorit 2026, në një fshat të rajonit të Strumicës, policia ndaloi një 38-vjeçar pas denoncimit se kishte ushtruar dhunë fizike ndaj bashkëshortes së tij 33-vjeçare dhe më pas e kishte nxjerrë atë dhe fëmijët e tyre të mitur nga shtëpia familjare.
Në Veles, u ndalua një 45-vjeçar, pas denoncimit të ish-bashkëshortes së tij 45-vjeçare për sulm fizik dhe kërcënime. Në Zletovë, policia ndaloi një 49-vjeçar pas denoncimit të partneres 37-vjeçare se ai e kishte sulmuar fizikisht. Në Gostivar, një grua 38-vjeçare denoncoi bashkëshortin 42-vjeçar për veprën penale “lëndim trupor”; policia e ndaloi atë.
Në rajonin e Ohrit, një grua 41-vjeçare raportoi se bashkëshorti e kishte fyer dhe kërcënuar përmes telefonit, ndërsa ajo ndodhej në punë. Në Çair të Shkupit, u ndalua një 51-vjeçar, i dyshuar për sulm fizik ndaj bashkëshortes së tij 47-vjeçare.
Në Gjorçe Petrov, një 19-vjeçar denoncoi se ish-partnerja e tij 17-vjeçare e kishte sulmuar dhe kërcënuar, si dhe kishte dëmtuar derën hyrëse të shtëpisë dhe automjetin e tij. Në Qendër të Shkupit, një 19-vjeçare denoncoi se babai i saj 49-vjeçar kishte kërcënuar atë dhe nënën e saj.
MPB-ja bëri të ditur se po ndërmerren masa për dokumentimin e plotë të rasteve dhe se pas tyre do të pasojnë parashtresat përkatëse. Ministria u bëri thirrje qytetarëve të mos heshtin përballë dhunës në familje. Viktimat dhe personat që kanë dijeni për raste të tilla mund t’i drejtohen stacionit më të afërt policor ose të telefonojnë në 112 dhe 192.