Ministria e Punëve të Jashtme e Malit të Zi ka reaguar ashpër ndaj nismave të disa kuvendeve komunale për të kundërshtuar pavarësinë e Republikës së Kosovës. Në një përgjigje zyrtare, institucioni sqaroi se këto vendime, të cilat nisën në maj të vitit 2026 nga Komuna e Zetës dhe u pasuan nga Komuna e Plevljes, nuk gëzojnë asnjë mbështetje ligjore apo kushtetuese.
Sipas ministrisë, e cila drejtohet nga Ervin Ibrahimoviq, njësitë e vetëqeverisjes lokale nuk janë të autorizuara të ndërhyjnë në fushën e politikës së jashtme apo të prodhojnë efekte juridike ndërkombëtare. Podgorica zyrtare theksoi se njohja e shteteve dhe vendosja e marrëdhënieve diplomatike mbeten kompetencë ekskluzive e autoriteteve qendrore, në përputhje me Kushtetutën dhe legjislacionin në fuqi.
Në reagim thuhet se këto nisma janë akte politike që nuk ndryshojnë detyrimet ndërkombëtare të Malit të Zi, por rrezikojnë të krijojnë tensione të panevojshme dhe një perceptim të gabuar për funksionimin e shtetit në arenën ndërkombëtare. Ministria u bëri thirrje bartësve të funksioneve publike të respektojnë rendin kushtetues dhe kredibilitetin e shtetit.
Sa i përket bashkëpunimit dypalësh, Ministria vlerësoi se Mali i Zi dhe Kosova kanë ndërtuar marrëdhënie shumë të mira ndër vite, të bazuara në besim të ndërsjellë dhe perspektivë të përbashkët evropiane dhe euroatlantike. Podgorica rikonfirmoi mbështetjen e saj të vazhdueshme për pjesëmarrjen dhe anëtarësimin e Kosovës në organizata dhe iniciativa rajonale e ndërkombëtare.