Ministri i Punëve të Jashtme dhe Tregtisë së Jashtme i Maqedonisë së Veriut, Timço Muçunski, zhvilloi sot një takim me Fernando Mariano Sampedro Marcos, sekretar shtetëror për Bashkimin Evropian në Ministrinë e Punëve të Jashtme, BE-së dhe Bashkëpunimit të Spanjës. Bisedimet u fokusuan në rrugëtimin integrues të Maqedonisë së Veriut dhe zhvillimet aktuale në procesin e zgjerimit të Bashkimit Evropian.
Muçunski shprehu mirënjohje për mbështetjen e vazhdueshme dhe parimore të Spanjës ndaj perspektivës evropiane të vendit, si dhe për përkushtimin e Madridit që zgjerimi të mbetet prioritet strategjik i Unionit. Ai nënvizoi nevojën për koordinim të ngushtë në diskutimet mbi të ardhmen e politikës së zgjerimit. "Procesi i anëtarësimit duhet të mbetet i besueshëm, i parashikueshëm, i barabartë për të gjithë dhe i bazuar në merita, me një synim të qartë përfundimtar – anëtarësim të plotë në BE, paralelisht me avancimin e formave praktike të integrimit gradual", theksoi ministri.
Gjatë takimit, Muçunski e informoi bashkëbiseduesin për rezultatet e arritura në zbatimin e Agjendës së Reformave, si dhe për përkushtimin e Qeverisë për zbatimin konsekuent të vlerave dhe standardeve evropiane në nivel kombëtar. Palët konfirmuan vullnetin për thellimin e bashkëpunimit dypalësh në kuadër të proceseve integruese.
Sekretari spanjoll Sampedro Marcos u prit në një takim të veçantë edhe nga zëvendëskryeministri i parë dhe ministër për Çështje Evropiane, Bekim Sali. Në këtë takim, palët diskutuan mbi avancimin e procesit të integrimit evropian dhe rëndësinë e zbatimit të reformave. Sali theksoi se ruajtja e kredibilitetit të politikës së zgjerimit është e një rëndësie strategjike jo vetëm për vendin, por edhe për stabilitetin dhe sigurinë e gjithë rajonit.