Në Kosovë, influencerët po përdorin ndikimin e tyre në rrjetet sociale, si Instagram dhe TikTok, për të promovuar një gamë të gjerë produktesh dhe shërbimesh, duke përfshirë kozmetikën, veshjet, restorantet, veturat dhe pompat e derivateve. Megjithatë, mungesa e një regjistri të veçantë për këtë kategori bën që institucionet shtetërore të mos kenë një pasqyrë të saktë të qarkullimit financiar në këtë treg.
Sipas zyrtares për komunikim në ATK, Fatime Krasniqi, veprimtaria e influencerëve konsiderohet aktivitet ekonomik dhe të ardhurat janë të tatueshme sipas legjislacionit në fuqi. Megjithatë, ATK nuk ka mundësi të ofrojë të dhëna statistikore për këtë grup, pasi ata nuk evidentohen si një kategori e veçantë në sistemin tatimor. Influencerët klasifikohen në sistemin ekzistues tatimor si persona fizikë ose juridikë, varësisht nga forma e tyre e regjistrimit.
Sipas ATK-së, në rastet kur influencerët kanë kontratë pune ose marrëveshje për shërbime të veçanta, ata duhet të figurojnë në listën e pagave të biznesit kontraktues. Nëse ata ushtrojnë veprimtari të pavarur ekonomike, ata kanë detyrimin ligjor për t'u regjistruar dhe për të deklaruar të ardhurat e tyre si biznese individuale. Aktualisht, mungon një rregullore specifike që do të vendoste standarde për transparencën e reklamave të paguara në hapësirën digjitale kosovare.