Administrata Tatimore e Kosovës (ATK) ka njoftuar se do të shtojë inspektimet në terren në të gjithë territorin e Kosovës, në kuadër të projektit për formalizimin e ekonomisë dhe vendosjen e etiketave identifikuese për bizneset e regjistruara.
ATK u bën thirrje personave që zhvillojnë aktivitete ekonomike të paregjistruara të regjistrohen vullnetarisht në Agjencinë për Regjistrimin e Bizneseve të Kosovës (ARBK), përpara se të identifikohen nga inspektorët tatimorë. Regjistrimi është obligim ligjor dhe shmang pasoja financiare e ligjore.
Në rast identifikimi të aktiviteteve të paregjistruara gjatë inspektimeve, ATK do të ndërmarrë pa përjashtim këto masa në përputhje me ligjin në fuqi:
• Regjistrimin e detyrueshëm të aktivitetit dhe pajisjen me Numër Fiskal;
• Aplikimin e gjobave dhe sanksioneve ligjore të parapara.
Regjistrimi vullnetar shmang penalitetet dhe kontribuon në një konkurrencë të drejtë në treg.
ATK kërkon gjithashtu nga tatimpaguesit e regjistruar të verifikojnë dhe përditësojnë të dhënat në sistemin tatimor, pasi mospërditësimi përbën shkelje ligjore.
Administrata thekson përkushtimin për luftimin e ekonomisë joformale dhe ndërtimin e një sistemi tatimor të drejtë, transparent dhe të barabartë për të gjithë.