Administrata Tatimore e Kosovës (ATK) ka njoftuar se të gjitha të ardhurat e realizuara nga kriptovalutat janë të tatueshme dhe duhet të deklarohen në përputhje me legjislacionin tatimor në fuqi.
Institucioni u bën thirrje personave fizikë joafaristë, personave fizikë afaristë dhe personave juridikë të deklarojnë dhe paguajnë tatimet në mënyrë të saktë dhe brenda afateve ligjore. ATK thekson se aktivitetet e saj do të përqendrohen te personat që nuk deklarojnë të ardhurat, me fokus të veçantë në identifikimin e atyre që realizojnë fitime nga kriptovalutat.
Mënyra e tatimit varet nga statusi i tatimpaguesit:
- Personat fizikë joafaristë dhe afaristë zbatojnë dispozitat e Ligjit Nr. 05/L-028 për Tatimin në të Ardhurat Personale.
- Personat juridikë zbatojnë Ligjin Nr. 06/L-105 për Tatimin në të Ardhurat e Korporatave.
Sipas normave tatimore për të ardhurat personale, të ardhurat vjetore deri në 3 mijë euro nuk tatohen, nga 3 mijë deri në 5 mijë e 400 euro aplikohet norma 8%, ndërsa mbi këtë nivel norma 10%. Për të ardhurat e korporatave, norma është 10%.
Në rast humbjeje, tatimpaguesit mbajnë evidenca të veçanta, të cilat duhet t'i vënë në dispozicion të ATK-së kur kërkohen. Deklarimi dhe pagesa bëhet me formularët e paracaktuar.
ATK paralajmëron se mosdeklarimi përbën shkelje ligjore dhe do të ndërmarrë masa ndaj atyre që nuk përmbushin detyrimet tatimore. Institucioni u kërkon tatimpaguesve të korrigjojnë deklaratat sa më parë për të shmangur sanksionet.