Sulmuesi i Kombëtares së Kosovës, Vedat Muriqi, ka dhënë një intervistë për mediat turke HT Spor në prag të ndeshjes vendimtare ndaj Turqisë në finalen e play-off-it për Kupën e Botës 2026, që zhvillohet të martën në Prishtinë.
Muriqi e pranoi Turqinë si favorite për shkak të lojtarëve të saj si Kenan Yildiz dhe Arda Güler, të cilët luajnë në ekipe të mëdha si Real Madridi dhe konsiderohen vlera për futbollin turk, evropian e botëror. Megjithatë, ai theksoi avantazhin e fushës vendase dhe forcën e lojës ekipore të Kosovës për të arritur objektivin.
Ai foli për karakterin luftarak të ekipit pas fitores dramatike ndaj Sllovakisë, ku Kosova u rikthye dy herë nga disavantazhi, pavarësisht organizimit të kundërshtarit që nuk kishte pësuar gol në katër ndeshjet e fundit. “Edhe pasi ishim duke humbur 1-0, nuk u dorëzuam kurrë. Jemi një ekip shumë i ri dhe luftojmë fort”, deklaroi Muriqi.
Sulmuesi prizrenas shprehu emocione të përziera personale ndaj Turqisë, ku u zhvillua si futbollist për tetë vjet te skuadra si Giresunspor, Gençlerbirligi, Rizespor e Fenerbahçe. Ai krahasoi një kualifikim të mundshëm në Botëror me “pavarësi të dytë” për Kosovën dhe la të kuptohet se ky mund të jetë cikli i tij i fundit me fanellën kuqezi, duke qenë se në prill mbush 32 vjeç.