Vedat Muriqi ka dalë në konferencë për shtyp para ndeshjes vendimtare mes Kosovës dhe Turqisë në finalen e play-off-it të Botërorit 2026.
Ylli kosovar shprehu respekt të madh për Turqinë, por theksoi se Kombëtarja e Kosovës synon fitoren dhe kualifikimin në turne.
"Kam shumë respekt për Turqinë, por nesër është ndeshje mes kombëtaresh. Nesër do të bëj çmos për të shkuar në Botëror me Kosovën. Mes vijave të fushës do të vazhdoj të kem respekt për Turqinë, por shkojmë për fitore", deklaroi ai.
Muriqi foli edhe për mungesën e golave në ndeshjet e fundit me Kosovën, duke thënë se kjo nuk paraqet problem për të.
"Nuk e kam problem që nuk kam shënuar që pesë ndeshje me Kosovën. Vetëm le të fitojë Kosova. Edhe nesër mos të shënoj, veç le të fitojmë", u shpreh kapiteni.
Ai përmendi ndeshjet e mëparshme të rëndësishme kundër Azerbajxhanit dhe Islandës, duke theksuar qetësinë në kamp dhe atmosferën e mirë.
"Kemi luajtur ndeshje të mëdha edhe më herët (kundër Azerbajxhanit e Islandës). Jemi të qetë. Atmosferë e jashtëzakonshme në kamp. Jam krenar që jam kapiten i këtyre lojtarëve, edhe pse janë të rinj, tashmë kanë përvojë", shtoi Muriqi.
Ndeshja Kosovë-Turqi zhvillohet nesër mbrëma në stadiumin Fadil Vokrri, duke filluar nga ora 20:45.