Në mbledhjen e Komisionit parlamentar për Buxhet, deputeti i Lidhjes Demokratike të Kosovës (LDK), Besian Mustafa, propozoi përfshirjen në rend dite të çështjeve urgjente lidhur me rritjen e çmimeve të derivateve të naftës dhe energjisë elektrike, si dhe mosekzekutimin e pagës së 13-të për punëtorët e Radio Televizionit të Kosovës (RTK) dhe sektorin e shëndetësisë.
Sipas Mustafës, kjo rritje ka reflektuar zinxhirisht në çmimet e transportit, ushqimit, inputeve bujqësore dhe çdo aspekt tjetër të jetës dhe buxhetit të qytetarëve. Ai theksoi se qeveria ka obligim kushtetues, ligjor, politik dhe moral për të mbrojtur qytetarët nga këto efekte, duke kërkuar raportim nga ministri i Financave, Hekuran Murati, për planet e qeverisë në këtë drejtim.
Deputetët e shumicës, kryesisht nga Lëvizja Vetëvendosje (LVV), nuk e përkrahën propozimin. Mustafa e cilësoi si fatkeqësi mos shtimin e këtyre pikave në rend dite, duke kërkuar të paktën një raportim mbi masat për mbështetje të qytetarëve.
Në lidhje me pagën e 13-të, Mustafa përmendi se punëtorët e RTK-së nuk e kanë marrë atë dhe raportimet në media tregojnë se një pjesë e sektorit të shëndetësisë nuk e ka marrë plotësisht ose fare. Ai kërkoi sqarime nga Murati për arsyet dhe planet kompensuese.
LDK ka thirrur për të premten një seancë të jashtëzakonshme parlamentare për rritjen e çmimit të derivateve. Kur u pyet për ftesën e kryeministrit Albin Kurti në lidhje me çështjen e presidentit, Mustafa u përgjigj se diskutimet e tilla zhvillohen në nivel të kryetarëve të partive dhe nuk mund të komentoje.