Komisioni për Buxhet i Kuvendit të Kosovës miratoi fushëveprimin e tij me 9 vota për, asnjë kundër dhe asnjë abstenim. Nuk kaloi propozimi i Lidhjes Demokratike të Kosovës (LDK) për të përfshirë një pikë shtesë që do të obligonte ministritë të raportojnë drejtpërdrejt në këtë komision.
Enver Haliti, kryetar i Komisionit për Buxhet, prezantoi fushëveprimtarinë, duke theksuar se komisioni është funksional dhe i përhershëm. Ai njoftoi se shqyrton të gjitha çështjet që lidhen me buxhetin dhe financat publike.
Fushëveprimi i komisionit përfshin:
- Shqyrtimin e projektligjit vjetor për ndarjet buxhetore dhe rishikimin e tij;
- Shqyrtimin e projektligjeve në fushën e financave publike;
- Shqyrtimin e projektligjeve për ratifikimin e marrëveshjeve ndërkombëtare me detyrime financiare dhe dhënien e rekomandimeve për Kuvend;
- Shqyrtimin e projektligjeve dhe amendamenteve në aspektin e ndikimit buxhetor;
- Të drejtën për të propozuar dhe hartuar projektligje;
- Shqyrtimin e raportit vjetor financiar të buxhetit;
- Shqyrtimin e raporteve vjetore të institucioneve dhe organeve të pavarura;
- Mbikëqyrjen e zbatimit të politikave publike në menaxhimin e financave, borxhit publik, prokurimit dhe politikave makroekonomike;
- Organizimin e dëgjimeve publike dhe raportimin me iniciativë të komisionit.
Përditësime
Qazim Mustafa nga LDK shpjegoi mungesën e pikës për raportet vjetore financiare të ministrive në Planin e Punës dhe propozoi shtimin e saj. Deputetja Shqipe Metaj nga VV u përgjigj se formulimi aktual përfshin raportimet, ndërsa detajet mund të sqarohen në plan. Mustafa replikoi se pika 7 përjashton ministrat dhe mbulon vetëm organet e pavarura. Komisioni vazhdon shqyrtimin dhe miratimin e Planit të Punës për sesionin pranveror.