Arbërie Nagavci, shefja e Grupit Parlamentar të Lëvizjes Vetëvendosje (LVV), ka komentuar vendimin e Gjykatës Kushtetuese që ka dhënë 34 ditë afat shtesë për vazhdimin e procedurës së zgjedhjes së presidentit të ri të Kosovës.
Sipas saj, ky është momenti për t’i lënë mënjanë inatet dhe për të zgjedhur presidentin. “Tashmë i kemi edhe 34 ditë për ta përfunduar procedurën për zgjedhjen e presidentit. Është një kohë kur duhet të gjitha inatet të largohen e ta zgjedhim presidentin”, ka deklaruar ajo në emisionin Frontal të T7-së.
Nagavci ka vlerësuar se nuk ka nevojë për zgjedhje të reja. “Besoj që vendit nuk i duhen edhe një palë zgjedhje të reja, e panevojshme dhe e padrejtë që të humbet kohë, aq më shumë që pritet që rezultati të jetë i njëjtë. Duhet një mobilizim e angazhim i të gjithë neve që të gjejmë mënyrën për të arritur një konsensus e ta votojmë presidentin e vendit”, ka shtuar ajo.