Arbërie Nagavci, shefe e Grupit Parlamentar të Lëvizjes Vetëvendosje (LVV), deklaroi se pret që vendimi final i Gjykatës Kushtetuese të jetë në favor të kërkesës së partisë së saj. Kjo vjen pas vendimit të Gjykatës për masë të përkohshme deri më 31 mars ndaj dekretit të presidentes Vjosa Osmani për shpërndarjen e Kuvendit, që pezullon edhe punën e tij.
Nagavci e mirëpriti këtë masë, duke thënë se një vendim tjetër do të krijonte pasoja të vështira për t'u rikuperuar. "Ne presim që Gjykata ta trajtojë me integritet dhe profesionalizëm dhe besojmë se vendimi do të jetë në favor të kërkesës sonë", u shpreh ajo për RTV21.
Ajo theksoi respektin e LVV-së ndaj vendimeve të Gjykatës Kushtetuese. Sipas saj, ka unitet mes ekspertëve, juristëve, ish-gjyqtarëve dhe profesorëve të së drejtës kushtetuese, të cilët vlerësojnë se dekreti bie ndesh me Kushtetutën.
Nagavci beson se kriza aktuale mund të tejkalohet me bisedime për zgjedhjen e presidentit të ri. "Ka ende hapësirë për pajtueshmëri. Një periudhë prej 59 ditësh do të ndihmonte në arritjen e konsensusit", deklaroi ajo.