Kryetari i Partisë Demokristiane të Shqipërisë (PDK), Nard Ndoka, ka kritikuar qasjen e Partisë Demokratike (PD) në lidhje me strategjinë opozitare dhe organizimin e saj politik.
I ftuar në emisionin "Off the Record" me gazetarin Andrea Danglli në A2CNN, Ndoka vlerësoi se protestat e fundit kanë adresuar saktësisht problemin e bllokimit të sistemit, por theksoi se opozita duhet të ndërmarrë hapa konkretë për të rimëkëmbur besimin e qytetarëve, aleatëve dhe partnerëve ndërkombëtarë.
Sipas Ndokës, mungesa e transparencës po dëmton figurën e opozitës. Ai solli si shembull komisionet parlamentare, duke vënë në dukje se si aleat i PD-së, ai nuk është në dijeni të ndonjë drafti për Reformën Territoriale dhe Reformën Zgjedhore, procese këto që sipas tij vijojnë prej një viti e gjysmë pa pasur konsulta me aleatët.
"Nuk duhet të presim radhën e qumështit për të marrë pushtetin. Kjo kërkon përgjegjësi politike," u shpreh Ndoka. Ai shtoi se opozita duhet të demonstrojë standarde të larta dhe se PD duhet të dalë mbi interesat e ngushta partiake për t'i dhënë përparësi interesit të shtetit dhe qytetarëve, duke e krahasuar qasjen aktuale me praktikat që sipas tij ndiqen nga mazhoranca.