Aleanca Veriatlantike do të mbajë një ceremoni zyrtare në selinë e saj në Bruksel për të shënuar 25-vjetorin e sulmeve terroriste në Shtetet e Bashkuara të Amerikës. Ngjarja do të zhvillohet pranë Memorialit të 11 Shtatorit dhe Nenit 5, duke nderuar viktimat e sulmeve të vitit 2001 dhe ushtarakët që kanë humbur jetën në misione pas atij momenti.
Në ceremoni janë planifikuar fjalime nga zyrtarët e lartë, përfshirë zëvendëssekretaren e Përgjithshme, Radmila Shekerinska, të Ngarkuarin me Punë të Misionit të SHBA-së në NATO, Scott Oudkirk, si dhe Përfaqësuesin Ushtarak të SHBA-së në Komitetin Ushtarak të NATO-s, gjenerallejtënant William D. “Hank” Taylor. Pjesëmarrësit do të mbajnë një minutë heshtje në orën 14:46, në përkujtim të momentit kur, 25 vjet më parë, ndodhi sulmi i parë ndaj Kullës së Veriut të Qendrës Botërore të Tregtisë në Nju Jork.
Flamujt do të ulen në gjysmë shtizë në selinë e Aleancës, në Komandën Supreme të Forcave Aleate në Evropë (ACO) në Mons të Belgjikës dhe në Komandën Aleate për Transformim (ACT) në Norfolk të Virxhinias. Pas fjalimeve, zyrtarët do të vendosin kurora me lule pranë memorialit.
Sulmet e 11 shtatorit mbeten një datë historike për NATO-n, pasi shënuan herën e parë të aktivizimit të Nenit 5 të Traktatit të Atlantikut të Veriut, i cili përcakton se një sulm i armatosur ndaj një anëtari konsiderohet si sulm ndaj të gjithë Aleancës.
Përditësime
Përfaqësuesit e përhershëm të vendeve anëtare të Aleancës, së bashku me anëtarë të komunitetit diplomatik dhe ushtarak, do të jenë të pranishëm në këtë ceremoni. Zyrtarët e lartë do të mbajnë fjalime përkujtimore për të nderuar sakrificën e pjesëtarëve të forcave të armatosura që humbën jetën gjatë dhe pas sulmeve të 11 shtatorit 2001.