Në moshën 79-vjeçare është ndarë nga jeta aktori i mirënjohur Sotir Stefa, një nga figurat më të dashura të skenës dhe humorit në qytetin e Fierit.
Për shumë vite, Sotir Stefa kontribuoi në jetën artistike të qytetit, duke sjellë përmes interpretimeve të tij emocione për breza të tërë spektatorësh. Ai do të mbahet mend për talentin, përkushtimin dhe thjeshtësinë që e karakterizonte, duke lënë pas një trashëgimi të çmuar për artin dhe kulturën fierake.
Kolegët dhe publiku do ta kujtojnë gjithmonë si një artist të respektuar dhe njeri me vlera të rralla. Largimi i tij përbën një humbje të madhe për komunitetin artistik dhe qytetin e Fierit.
Përditësime
Qyteti i Fierit përcolli për në banesën e fundit aktorin e mirënjohur Sotir Stefa. Në homazhet zyrtare morën pjesë personalitete të artit, ndër të cilët Luftar Paja, Vasil Vaso dhe Xhulieta Kulla.
Në teatrin 'Bylis', familjarë, miq dhe artdashës i dhanë lamtumirën e fundit aktorit të mirënjohur Sotir Stefa. Aktori Luftar Paja vlerësoi kontributin e tij të çmuar në estradën shqiptare, ndërsa kolegët veçuan talentin e Stefas për t'i shndërruar rolet dytësore në figura të paharrueshme për publikun.