Aktori Zhani Ziçishti, i njohur si Zhani Petro, u nda nga jeta më 25 shkurt 2026, në moshën 86-vjeçare. Lajmin e bëri publik Qendra e Artit dhe Kulturës Korçë, e cila theksoi kontributin e tij të gjatë në teatër dhe kinematografi shqiptare.
Karriera artistike
Ziçishti lindi më 31 maj 1940 në Korçë. Pas studimeve në Institutin e Lartë të Arteve (sot Akademia e Arteve), filloi punën si aktor në Teatrin “Andon Zako Çajupi” në Korçë, ku interpretoi role të shumta dhe u bë i njohur për publikun artdashës.
Në kinematografi, roli i tij i parë ishte mësuesi Agron në filmin “Lumë drite” (1970). Gjatë karrierës luajti në mbi 16 filma artistikë. Ndër rolet kryesore përmenden ato në filmat “Mesi i errësirës”, “Përballimi” dhe “Asgjë nuk harrohet”.
Filmografia e tij përfshin:
- 1990 – Kronikë e një nate
- 1988 – Rikonstruksioni
- 1987 – Përsëri pranverë
- 1986 – Dhe vjen një ditë
- 1986 – Tre ditë nga një jetë
- 1986 – Një jetë më shumë
- 1985 – Asgjë nuk harrohet
- 1981 – Agimet e stinës së madhe
- 1981 – Kur xhirohej një film
- 1980 – Dëshmorët e monumenteve
- 1979 – Mysafiri
- 1978 – Nga mesi i errësirës
- 1978 – Vajzat me kordele të kuqe
- 1977 – Flamur në dallgë
- 1976 – Fije që priten
- 1975 – Rrugicat që kërkonin diell
- 1975 – Beni ecën vetë
- 1972 – Përballimi
- 1970 – Lumë drite
Homazhet
Homazhet do të zhvillohen më 26 shkurt, nga ora 09:30 deri në 10:30, në hollin e teatrit në Korçë. Komuniteti artistik, familjarët dhe miqtë do t’i japin lamtumirën e fundit këtij artisti.
Përditësime
Homazhet për aktorin korçar Zhani Ziçishti u mbajtën këtë të enjte në Teatrin e Korçës.
Të afërmit, kolegët dhe përfaqësuesit e pushtetit vendor e vlerësuan atë si profesionist të përkushtuar.
Petrika Riza foli për talentin dhe karrierën e Zhani Ziçishti. Refik Xhinaku theksoi stilin e interpretimit të tij dhe humbjen për teatrin. Arjan Kallço rrëfëu miqësinë, emigrimin në Greqi dhe histori personale. Kryebashkiaku Sotiraq Filo vlerësoi kontributin e tij në plejadën e artistëve korçarë.
Homazhet përfshinin kurora lule, një minutë heshtje para portretit dhe vlerësimin nga drejtoresha e Qendrës për trashëgiminë e tij artistike.