Ndahet nga jeta aktorja legjendare Eva Marie Saint

Aktorja e njohur amerikane, Eva Marie Saint, ka ndërruar jetë në moshën 102-vjeçare nga shkaqe natyrore në shtëpinë e saj në Los Angeles. Lajmin e ka konfirmuar përfaqësuesi i saj, Jeff Sanderson. Saint njihej si një ndër aktoret e fundit të brezit të artë të Hollywood-it, me një karrierë që shtrihej mbi shtatë dekada. Debutimi i saj në ekranin e madh në vitin 1954 me dramën “On the Waterfront”, me regji të Elia Kazan, i solli asaj çmimin Oscar për aktoren më të mirë në rol dytësor. Në këtë film, ajo luajti rolin e Edie Doyle përkrah aktorit Marlon Brando. Një tjetër moment kyç në karrierën e saj ishte viti 1959, kur ajo interpretoi rolin e Eve Kendall në filmin thriller të Alfred Hitchcock, “North by Northwest”, ku luajti krah aktorit Cary Grant. E lindur më 4 korrik 1924 në Newark, New Jersey, Saint e nisi rrugëtimin e saj artistik në radio dhe televizion, për të vijuar më pas në skenat e Broadway-it. Gjatë karrierës së saj të gjatë, ajo ka bashkëpunuar me emra të shquar si Paul Newman, Gregory Peck, Warren Beatty dhe Yves Montand. Përveç kinemasë, ajo u dallua edhe në televizion, ku në vitin 1990 fitoi një çmim Emmy për miniserialin “People Like Us”. Në vitet e mëvonshme, ajo u rikthye në kinema me rola si ai i Martha Kent në filmin “Superman Returns” (2006). Aktorja ishte martuar me regjisorin Jeffrey Hayden, i cili ndërroi jetë në vitin 2016 pas 65 vitesh martesë; çifti la pas dy fëmijë.