Etmond Llabani, drejtori i komanduar i Institucionit të Ekzekutimit të Vendimeve Penale (IEVP) Durrës, ka ndërruar jetë më 5 prill 2026. Lajmin e ka konfirmuar Drejtoria e Përgjithshme e Burgjeve.
Llabani u emërua në krye të IEVP Durrës më 15 janar 2026, një ditë pas shkarkimit të drejtorit të mëparshëm, Indrit Cërrloj, me urdhër të Ministrit të Drejtësisë, Besfort Lamallari. Emërimi erdhi në vijim të arratisjes së të paraburgosurit Altin Ndoci nga spitali i Durrësit më 13 janar. Kjo ngjarje çoi në pezullimin e zinxhirit komandues të IEVP Durrës dhe në arrestimin e 8 zyrtarëve të burgut.
Më 19 janar, pak ditë pas marrjes së detyrës, Llabani pësoi një hemorragji cerebrale. Ai iu nënshtrua një ndërhyrjeje kirurgjikale në shërbimin e Neurokirurgjisë në Qendrën Spitalore Universitare Tiranë (QSUT). Një muaj më vonë, pas kërkesës së familjarëve, u transferua për trajtim të specializuar në Itali, ku qëndroi i shtruar për gati dy muaj.
Pavarësisht përpjekjeve mjekësore, Llabani nuk arriti të mbijetojë. Më parë, ai kishte mbajtur detyrën e drejtorit në burgun e Peqinit.
Mesazhi i Drejtorisë së Përgjithshme të Burgjeve
Drejtoria e Përgjithshme e Burgjeve shprehu ngushëllimet përmes një mesazhi: «Lamtumirë, Etmond! Pas një beteje të vështirë me shëndetin, kolegu ynë i nderuar, ish-drejtori i komanduar në IEVP Durrës, Etmond Llabani, u largua përgjithmonë nga kjo botë, por kujtimi i tij do të jetojë tek të gjithë ata që e njohën dhe punuan me të. Etmondi ishte një njeri me vlera të çmuara njerëzore, i dashur e kudogjendur për të dhënë kontributin e tij, një koleg i palodhur e mbi të gjitha një baba i dashur e i përkushtuar».
Përditësime
Bashkëshortja e Etmond Llabani-t postoi në rrjete sociale, dy ditë para vdekjes së tij, mesazhin: “Mond shpirti im, duhet t’ia dalësh për ne sepse ti nuk do doje kurrë të na lije vetëm... Ne nuk dimë të bëjmë asgjë pa ty dhe nuk e duam jetën pa ty”.
Ai lë pas tre fëmijë, të cilët bashkëshortja i quan “tre engjëjt e tyre”.