Shërbimet e Policisë Kufitare kanë ndaluar në pikën e kalimit kufitar Kakavijë një 17-vjeçar, i shpallur në kërkim nga Komisariati i Policisë Gjirokastër.
Ky i mitur dyshohet se ka abuzuar seksualisht me një 10-vjeçar në prani të dy shtetasve të tjerë të mitur, të moshës 9 dhe 10 vjeç. Ngjarja u raportua dy ditë më parë, kur 10-vjeçari së bashku me prindërit e tij u paraqitën në polici për të bërë kallëzim.
Policia dyshonte se 17-vjeçari ishte larguar drejt Greqisë para denoncimit. Ai u kap në hyrje të Republikës së Shqipërisë nga shërbimet e Policisë Kufitare.
Sipas njoftimit zyrtar të Policisë së Gjirokastrës, specialistët për Hetimin e Krimeve ndaluan të shpallurin në kërkim. Materialet i kanë referuar Prokurorisë për veprime të mëtejshme ligjore.
Policia e Gjirokastrës vijon hetimet për zbardhjen e plotë të rrethanave të ngjarjes.