Gjatë mbrëmjes së të enjtes, në pikëkalimin kufitar në Jarinjë, është ndaluar një shtetas nga Kosova, pjesëtar i Ministrisë së Punëve të Brendshme të Serbisë (MUP). Policia e Kosovës ka konfirmuar rastin dhe ka bërë të ditur se personi është marrë në pyetje, duke sqaruar se ky veprim nuk nënkupton domosdoshmërisht dërgimin e tij në mbajtje.
Sipas një dokumenti të Ministrisë së Punëve të Brendshme (MPB) të Kosovës, të siguruar nga transmetuesi publik RTK, më 6 gusht 2026 është marrë vendimi për heqjen e shtetësisë së Republikës së Kosovës për Vido Gjuriqiq (i njohur edhe si Gjuriçiq), i lindur më 11 shkurt 1973 në Mitrovicë. Në arsyetimin e këtij vendimi, theksohet se ai ka poseduar njëkohësisht shtetësinë e Kosovës dhe atë të Republikës së Serbisë.
Institucionet e Kosovës kanë vlerësuar se fakti që ai është anëtar i forcave policore të një shteti tjetër, pa marrë pëlqimin e organeve kompetente, përbën një veprim që rrezikon sigurinë kombëtare të vendit.