Pas atentatit të ndodhur në qytetin e Sarandës më 20 shtator, ku mbeti i vrarë 44-vjeçari Artan Myrtaj, autoritetet e larta të sigurisë kanë ndërmarrë masa administrative dhe operacionale. Ministri i Brendshëm, Ervin Demo, gjatë një takimi me drejtuesit e policisë në qarqe, ka urdhëruar shkrirjen e të gjithë zinxhirit drejtues të Komisariatit të Policisë së Sarandës. Ky vendim vjen pas një serie ngjarjesh kriminale të regjistruara në zonë, që përfshijnë atentate, plagosje dhe shkatërrime prone.
Drejtori i Përgjithshëm i Policisë së Shtetit, Skënder Hita, ka urdhëruar ngritjen e një strukture të posaçme, e cila do të përbëhet nga ekspertë të Departamentit të Policisë Kriminale dhe Departamentit të Sigurisë Publike. Sipas të dhënave, kjo Task-Forcë do të ketë si qëllim analizimin e thelluar të ngjarjeve kriminale dhe forcimin e sigurisë në territor. Burime të ndryshme bëjnë me dije se grupi i punës do të përbëhet nga 10 persona të stacionuar në Sarandë.
Policia e Shtetit ka njoftuar gjithashtu se procesi i rivlerësimit do të përfshijë jo vetëm zinxhirin drejtues, por edhe punën e efektivëve të rolit bazë. Strukturat e posaçme do të bashkëpunojnë ngushtë me Drejtorinë Vendore të Policisë Vlorë për të zbardhur atentatin ndaj Myrtajt, ngjarje në të cilën mbeti i plagosur edhe një kalimtar i rastit. Në planin organizativ, po punohet për krijimin e njësive të specializuara për luftën kundër krimit të organizuar dhe krimeve të rënda, të cilat do të mbështeten me logjistikën e nevojshme për të garantuar kontrollin e territorit.