Agjencia e Mbikëqyrjes Policore, në bashkëpunim me Policinë e Shtetit dhe Prokurorinë e Juridiksionit të Përgjithshëm Sarandë, ndaloi katër punonjës policie në Sarandë.
Të arrestuarit janë Komisar Gëzim Bashllari, shef i Komisariatit të Policisë Sarandë, Nënkomisar Andi Duro, specialist për hetimin e krimeve, Nënkomisar Ajdin Ismailaj, specialist për rendin, dhe Inspektor Robert Çullaj, specialist zone.
Ndaj tyre rëndojnë dyshime për veprat penale të shpërdorimit të detyrës, kryerjes së veprimeve arbitrare dhe mosmarrjes së masave për ndërprerjen e gjendjes së paligjshme, të kryera në bashkëpunim.
Hetimet lidhen me një ndërtim pa leje në një hapësirë plazhi në lagjen nr. 1 të Sarandës. Policia arrestoi në flagrancë tetë shtetas që punonin në objekt dhe shpalli në kërkim një shtetase që posedonte hapësirën.
Drejtori i Përgjithshëm i Policisë së Shtetit urdhëroi pezullimin e menjëhershëm nga detyra të katër efektivëve. U pezullua gjithashtu Komisar Blerim Tafçiu, shef i Seksionit për Hetimin e Krimeve në Volum, pasi nuk u paraqit për marrje në pyetje.
Hetimet vazhdojnë për dokumentimin e plotë të përgjegjësive dhe identifikimin e personave të tjerë të përfshirë.