Punonjësi i Policisë së Sarandës, Ajdin Islamaj, i cili mbante detyrën e specialistit për hetimin e krimeve në kohën e ngjarjes, është vendosur nën masën e sigurisë "arrest në shtëpi". Vendimi vjen pas hetimeve të thelluara të Agjencisë së Mbikëqyrjes Policore (AMP), të zhvilluara nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë.
Nga akti i ekspertimit teknik në kuadër të procedimit penal 304/2026, rezultoi se në banesën ku banon efektivi, e cila është në pronësi të babait të tij, është shtuar një kat i ri mbi një godinë ekzistuese dykatëshe. Sipërfaqja e ndërtuar pa lejen e organeve kompetente llogaritet të jetë jo më pak se 159 metra katrorë.
Hetimet kanë zbuluar se punimet, të cilat përfshinin edhe ndërhyrje rikonstruktive për ndryshimin e destinacionit të objektit në hotel, janë realizuar gjatë vitit 2025. Ekspertët e licencuar konfirmojnë se këto punime përbëjnë ndërtim të ri, për të cilin kërkohej detyrimisht pajisja me leje ndërtimi, e cila nuk rezulton të jetë miratuar.
AMP thekson se vijon hetimet për të dokumentuar të gjitha përgjegjësitë penale dhe për të identifikuar personat e tjerë që mund të jenë përfshirë në këtë veprimtari. Agjencia rikonfirmoi se respektimi i ligjit është detyrim për çdo punonjës policie dhe çdo shkelje do të trajtohet pa përjashtim.
Përditësime
Hetuesit siguruan prova vendimtare ndaj efektivit të Policisë së Sarandës, i cili ndodhet në masën e sigurisë 'arrest shtëpie'. Prokuroria konfirmoi zhvillimet e reja në hetim:
- Pamjet satelitore provojnë se ndërtimi pa leje është kryer gjatë vitit 2025.
- Dokumentacioni i shërbimit vërteton se efektivi ka mbuluar zonën ku është ngritur objekti përgjatë të njëjtit vit.