Agjencia e Mbikëqyrjes Policore (AMP) ka pezulluar përkohësisht nga detyra punonjësit që shfaqen në një video të publikuar së fundmi në rrjetet sociale, ku ata dëgjohen duke komentuar kalimtare në qytetin e Sarandës. Përveç kësaj mase, institucioni ka nisur një procedim disiplinor për sqarimin e plotë të rrethanave të rastit.
Sipas njoftimit zyrtar të AMP-së, prania e punonjësve në atë vendngjarje lidhej me zbatimin e një urdhri të prokurorit, të nxjerrë mbi bazën e një vendimi gjykate, për kontrollin e banesës së punonjësit të policisë, Ajdin Islamaj. Ky i fundit është person nën hetim në kuadër të procedimit penal nr. 304/2026 për veprën penale "Shpërdorimi i detyrës", parashikuar nga neni 248 i Kodit Penal, ndaj të cilit është caktuar një masë sigurimi.
Në raportimin e saj, AMP sqaroi se gjatë ekzekutimit të kontrollit më 11 qershor 2026, Ajdin Islamaj ka kundërshtuar dhe ka refuzuar të hapë derën e banesës. Aktualisht, po kryhen veprimet e para procedurale dhe materialet përkatëse do t'i referohen Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për vlerësim dhe ndjekje të mëtejshme sipas kompetencës.