Gjykata e Shkallës së Parë e Juridiksionit të Përgjithshëm në Sarandë ka shqyrtuar kërkesën për ndryshimin e masave të sigurisë ndaj një grupi zyrtarësh dhe ish-zyrtarësh, në kuadër të procedimit penal nr. 304 të vitit 2026. Personat nën hetim akuzohen për veprat penale "Shpërdorimi i detyrës", "Mosmarrja e masave për ndërprerjen e gjendjes së paligjshmërisë" dhe "Ndërtimi i paligjshëm".
Sipas vendimit të gjykatës, masat e sigurisë janë si vijon:
- Irakli Koçiaj, oficer i Policisë Gjyqësore, u la në masën "detyrim paraqitje", shoqëruar me pezullim nga detyra dhe ndalim të daljes jashtë shtetit.
- Eduart Veli, ish-kryeinspektor i IVMT-së në Bashkinë Sarandë, u vendos në "arrest shtëpie", me mundësinë e zëvendësimit të kësaj mase përmes një garancie pasurore prej 100 000 lekësh.
- Romelio Kadëna, Ilia Gjika dhe Elvis Memushi, ish-inspektorë të IVMT-së, mbeten në masën "detyrim paraqitje".
Hetimet për këtë çështje fokusohen te mosveprimi i autoriteteve për ndërprerjen e ndërtimeve të paligjshme në dy objekte: strukturën "Copa Cabana", e cila është shembur nga Inspektorati Kombëtar i Mbrojtjes së Territorit (IKMT), dhe një kat shtesë të paautorizuar në hotel "Oasis". Prokuroria e Sarandës thekson se hetimet vijojnë për të dokumentuar përgjegjësitë e çdo punonjësi të institucioneve të përfshira, duke mos përjashtuar zgjerimin e hetimeve ndaj subjekteve të tjera.