Seanca gjyqësore në Gjykatën e Sarandës zgjati shtatë orë për caktimin e masës së sigurimit ndaj katër efektivëve të Komisariatit të Policisë Sarandë. Ata u ndaluan katër ditë më parë nga AMP nën dyshimin për favorizim të ndërtimeve pa leje në zonën e Sarandës dhe Ksamilit.
Prokurorët Silvana Belishta dhe Esmeranda Basho kërkuan arrest në burg për 45 ditë ndaj ish-shefit të komisariatit Gëzim Bashllari dhe specialistit të zonës Robert Çulli. Për oficerët e krimeve Andi Duro dhe Ajdin Islamaj u kërkua masa e arrestit në shtëpi.
Gjyqtari Shkëlzen Liçaj pranoi pjesërisht kërkesën e prokurorisë. Ai uli afatin e arrestit në burg në 30 ditë për Gëzim Bashllari dhe Robert Çulli, ndërsa la të pandryshuar masën e arrestit në shtëpi për dy oficerët e tjerë.
Avokati mbrojtës i Gëzim Bashllari, Edison Ademi, deklaroi jashtë seancës se gjykata e vlerësoi ndalimin si të paligjshëm dhe se provat ishin të pamjaftueshme. Efektivët po hetohen për dyshime të përfshirjes në veprimtari korruptive lidhur me ndërtimin e beach bar-it pa leje në Ksamil.