Disa lagje në Prishtinë kanë mbetur pa furnizim me energji elektrike për mbi nëntë orë, duke nisur që nga ora 14:00 e së dielës. Ndërprerja ka prekur Lagjen e Spitalit, zonën e Qendrës Studentore, rrugët “B” dhe “Muharrem Fejza”, si dhe lagjen Dardania. Konsumatorët e furnizuar nga nënstacioni Prishtina 6 janë më të prekurit.
Sipas KOSTT-it, shkak i ndërprerjes është një shembje dheu në rrugën “Don Shtjefën Kurti”, e cila ka dëmtuar infrastrukturën energjetike dhe rrjetin transmetues në nivelin 110 kV. Ekipet e KOSTT-it, në koordinim me KEDS-in, janë në terren për sanimin e dëmeve dhe rikthimin sa më të shpejtë të furnizimit.
KEDS-i nuk ka dhënë përgjigje zyrtare për afatet e rikthimit të energjisë, pavarësisht ankesave të qytetarëve në rrjetet sociale. Banorët shprehin pakënaqësi për mungesën e informacioneve dhe njoftimeve paraprake.
Ndërprerja ka shkaktuar probleme edhe në trafik, veçanërisht në zonën e Qendrës Studentore, ku semaforët kanë mbetur jashtë funksioni dhe ka kaos qarkullimi. Në këtë pjesë, Policia e Kosovës po menaxhon qarkullimin.
Drejtori i Drejtorisë për Siguri dhe Emergjenca, Lulëzim Fushtica, ka njoftuar se shembja ka ndërprerë përkohësisht edhe furnizimin me ujë, për shkak të dëmtimit të infrastrukturës dhe punimeve në terren. Nuk dihet ende nëse ndikimi do të shtrihet në lagje të tjera.